AP-ah Covid-19 thihpui pasarih an awm tawh
Arunachal Pradesh-ah Covid-19 vangin mi pahnih an thih belh leh a, anni nen hian an state-a hripui vanga thi hi mi pasarih an awm tawh.
Covid-19 vanga thite hmeichhia kum 65 mi, Chimpu-a Dedicated Covid Hospital (DCH)-a enkawl lai leh, sipai kum 44 mi West Kameng district-a sipai hospital-a enkawl lai an ni. Inrinni liam ta khan state chhungah hri kai hmuh thar mi 112 awm lehin, hri kai hmuh chhuah tawh hi mi 3,745 an awm tawh. August thla chhung bika hri kai hmuh chhuah hi 2,274 an tling a, an zingah hian sipai mi lehsa 817 an tel a ni.
Assembly Secretariat complex khar
Arunachal Pradesh Assembly speaker Pasang D Sona chuan Assembly Secretariat-a thawktu ṭhenkhatin Covid-19 an kai tih hriat a nih avangin assembly complex hi kar liam ta Zirtawpni aṭangin khar a ni.
Rapid Antigen Test (RAT) hmanga endiknaah Assembly Secretariat-a thawktu panga ten hri an kai tih hriat an ni a, Lekhi-a Covid Care Centre-ah dah luh nghal niin, an primary contact-te pawh chhui zui nghal a ni. Thawktu zinga hri kai hmuh an awm avangin Assembly Secretariat hi ni thum chhung khar a ni a, damdawi hmanga kah thianghlim a ni nghal bawk.