Assam district 4-ah Associate Official Language atan Manipuri puang

Assam sorkar chuan August 29, Ningani khan Assam Official Language (Amendment) Bill, 2024 pawmin an state chhunga district paliah Manipuri chu 'Associate Official Language' atan a pawm.

Barak valley-a cheng, Manipuri ṭawng hmangten hun rei tak aṭanga an lo ngiat tawh angin Manipuri chu Associate Official Language-ah telh niin, parliamentary affairs minister Pijush Hazarika chuan Bill hi sawi ho tura pharhin pawm a ni ta a ni.

Assam chhunga district pali - Cachar, Hailakandi, Karimganj leh Hojai ahte Associate Official language atan Manipuri hi hman a ni ang. Assam chief minister Himanta Biswa Sarma chuan tualṭo hnamte chindan leh ṭawng humhalh chu sorkarin a ngai pawimawh tih a sawi.

Manipur chief minister N Biren Singh chuan Assam CM Himanta hnenah hian lawmthu hrilhin Assam-a cheng, Manipuri ṭawng hmangtuten hamṭhatna an neih belh ngei an beisei tih a sawi a, exam hmachhawn ṭhinte chuan Manipuri ṭawng hmangin an exam thei tawh dawn vangin lawmawm a tih thu a sawi a ni.