Manipur : UCM office-ah bomb pahnih ti puak

Manipur-a Lamphel, Imphal West-a civil society organisation, United Committee Manipur (UCM) office-ah Ningani zan khan bomb chak tak pahnih a puak a, thi leh hliam erawh an awm hriat a ni lo.

Police-te chuan Ningani zan dar 7:45 vel khan motor pakhat chu UCM office hi panin, motor chhung aṭang hian office compound chhungah grenade nia hriat pahnih vawm luh a nih thu an sawi. Campus-ah grenade pakhat hi puakin, pakhat zawk hi main gate bulah a puak bawk.

He thil thleng vang hian security force-te chuan Lamphel area chu uluk zawkin an endik a, pawikhawihtute pawh man ngei tumin hma an la zui nghal a ni. Police official-te chuan pawikhawihna thlenna hmun hi an tlawh tawh bawk a ni.

UCM hi July 3, 2001-a din niin, Manipur-a civil society group eng emaw zat an tel a ni. Kumin February 23 khan an office hi beih ni tawhin, mi tu tih hriat lohten an hal a ni.