Arunachal : APPSC zawhna put ru chhui hna CBI in an zo

Central Bureau of Investigation (CBI) chuan Arunachal Pradesh Public Service Commission (APPSC) in Assistant Engineer (Civil) hna an lak ṭuma zawhna put ru chungchang an chhuinaah, kar liam ta Zirtawpni khan he thubuaia thil dik lo titua puhte lakah supplementary chargesheet pathumna an thehlut tih sawiin, thubuai chhuichian hna chu an zo fel tih an tarlang.

Assistant Engineer (Civil) examination, 2022 kuma neihah khan zawhna an hriat lawk theih nan pawisa inpek a awm nia tarlan niin, thil tisualtua puh hian an fapa exam turin zawhna a hriat lawk theih nan Rs nuai 5 APPSC official aiawh hnenah a hlan tih an hriat thu CBI chuan an tarlang.

CBI chuan pawisa dawngtu leh zirlai exam hmachhawntu lakah hian chargesheet dang an thehlut tawh tih an sawi a, anni bakah midang paruk - private coaching institute a zirtirtu leh khatih hunlaia APPSC deputy secretary-cum-deputy controller of examinations te chu chargesheet hian a huam tel a ni.

CBI hian October 26, 2022 khan thubuai hi ziak lutin, APPSC Deputy Controller of Examination leh a aiawh (middleman) leh midangte chuan zirlai ṭhenkhat hnenah zawhna hi an hralh ru niin an tarlang.