Manipur : CM-in ruihhlo do tura hmalak zel a tiam

Manipur chief minister N Biren Singh chuan state chhunga ruihhlo hluar zel chuan Manipur chu poppy chinna hmun leh tawlh rukna hmunpuiah a chhuah thei nia sawiin, a do turin hma an la zel dawn tih a sawi.

Manipur chu 'Golden Triangle' - khawvel huapa ruihhlo tawlh rukna hmunpui hnaiha awm a ni tih sawiin a nghawng ṭha lo tak avangin 'Dead Triangle' tiin a vuah a ni. Manipur ṭhalai nuai 1.5 chuang chu ruihhlo vang hian an buai tih tarlangin, ruihhlo nena an indonaah hian hnehna an chan ngei a ngai tih Singh chuan a sawi.

Biren Singh chuan ruihhlo laka an ram venhim chu a mawhphurhna pakhat a nih thu leh, hmanhmawh taka hmalak a ngai a ni, a ti. An ṭhalaite ruihhlo bawiha an tan chhan pakhatah Myanmar aṭanga raltlante chu puhin, anni hi India ram chhungah dan loa an rawn luh bakah an ṭhalaite tichhe thei thil rawn keng lutah a puh a ni.

Manipur CM hian kum 2018, November aṭang khan sorkar chuan 'War on Drugs Mission' a kalpui tih a sawi a, poppy chinna hmun leh ruihhlo tawlhruk tihtawp chu an tum ber a ni. Singh hian kum 2018 hnuah ruihhlo Rs vbc 60,000 hu an man tawh a, hei bakah poppy chinna hmun 16,161 acres-a zau an tichhe tawh tih a tarlang bawk. Ruihhlo kaihhnawih thubuai hi 2,351 an ziak lut tawh bawk a ni.