Assam-ah swine flu vei 22 an awm

Ramchhung hmun hrang hranga hri leng mek, swine flu chu Assam-ah mi 22 an vei tih hmuhchhuah a ni tawh niin state sorkar chuan a sawi.

Health and Family Welfare Department-in thuchhuah a siam­ah, kar kalta Zirtawpni thleng khan mi 22-te chu swine flu an vei tih finfiah a ni tawh tih a tarlang. Heng zinga mi 9 chu Guwahati a mi an ni a, panga chu Dibrugarh mi, Jorhat-ah mi pali, Sonitpur-ah pathum leh Kamrup Rural district-ah mi pakhat an ni.

Assam-ah hian swine flu vang­in mi pahnih an thi tawh a, an pahnih hian Jorhat mi ve ve an ni.

Sorkar chuan swine flu veite enkawlna tur damdawi a ngah tawk tih a sawi a, a veite enkawlna tur hian district hospital tin chu isolation ward siam leh, medical college hospital-te chu ICU unite siam vek turin a hrilh.

Sorkar laipui chuan swine flu hi category pathum - A, B leh C in a ṭhen a, A leh B caterogy-te chu damdawi-ina enkawl kher ngai lo an ni a, C caterogy erawh chu rang taka enkawl tura tih an ni.

Swine flu leng vang hian ramchhung hmun hrang hrangah mi 1,895 an thi tawh a, a hri vei zat hi 32,000 an tling tawh bawk. Union Health Ministry chuan swine flu vanga thi zinga 734 (34%) chu kum 30-45 inkar an ni a, 32% chu kum 45-60 inkar an ni tih a tarlang.