Manipur-ah army convoy ambush a ni

Tamenglong district, Manipur-ah kar kalta Inrinni khan 2/5 Gorkha Rifles convoy chu ambush a ni a, sipai pali-in hliam an tuar. Hliam tuar zinga pakhat hi a dinhmun a ṭha lo hle.

Police-te chuan sipai convoy ambush-na hmun hi Khoupum police station-a Luwang Khunou khuaah a nih thu an sawi. Zing dar 8.15 velah hel nia hriatte chuan IED tipuakin, sipai convoy hi an kap zui ta niin an sawi. Sipaite hian an kap let ve nghal a, hun rei vak lo inkapin helho hi ramhnuai lamah an tlanchhia a ni.

NSCN (Khaplang) chuan sipai convoy ambush-tu an nih thu sawiin, an inkahnaah hian sipai pahnih an kaphlum tih an sawi. NSCN (K) thupuangtu nia inchhal chuan, 'Sipai pahnih kan kaphlum a, midang pawh kan kap hliam. Hliam tuar kan awm lo' a ti. Mahse sipai lam chuan thi an awm lo niin an sawi thung.