KNP-a samak pèl ṭhin veng turin task force din dawn

Union Environment Minister Prakash Javadekar chuan sapel ru ṭhinten Karizanga National Park, Assam-a samak ki khat nei chi an pel ruk ṭhin veng turin sorkar laipui bultumin special task force din a ni dawn tih a sawi.

Javadekar chuan sapel ruk ṭhin veng tur hian anti-poaching law pawh siam ṭhat thuai a ni dawn tih a sawi. 'Samak pel ruk ṭhin ven dan tur leh, sapel ru ṭhinte laka action lak dan tur hi sorkar laipui chuan Kaziranga National Park-a forest official-te leh state sorkar official-te rawnin a la duang dawn a ni' a ti.

Minister chuan a ṭul a nih chuan Kaziranga National Park-a hmalakna atan hian Tiger Project sum pawh pawhpen a ni mai dawn tih a sawi a, Park chhung uluk zawka endik hna thawk turin 'Rhino Mitra' 31 dah a ni tawh bawk tih a sawi.

Kum 2013 aṭang khan ramsa humhalh, samak ki khat nei chi hi Assam-ah 75 vel kahhlum an ni tawh. Assam Environment and Forest Minister Atuwa Munda chuan kum 2013 khan sapel ruten samak hi 37 an kaphlum a, 2014-ah 34, kumin March 6 thleng khan samak 6 chu sapeltute kutah an thi leh tawh bawk.

Samak kahhlum zinga 54 hi Kaziranga National Park chhunga mi niin, Manas National Park-ah paruk leh Orang National Park-ah panga thah an ni a, Pobitora Wildlife Sanctuary-ah pali thah an ni bawk. Forest guard leh security force-te chuan dan kalha sa peltu mi 124 an man tawh a ni.

Sapeltute kuta thi bakah, kum 2013 January thla aṭang khan chhiatna thleng leh thil dang vangin samak hi 146 an thi bawk.