thupekin nimin khan AP-ah Congress sorkar din leh a ni

Congress MLA hel ten an party an chhuahsan avanga sorkar thar a pian hnuah, nimin khan Supreme Court chuan Arunachal Pradesh-ah hian Congress sorkar din leh turin thu pek a chhuah. Hei hi Supreme Court-in sorkar thar a pian hnua sorkar ngai bawk sorkar chhunzawm leh tura a tih vawi khatna leh awm chhun a ni.

Constitution Bench Judge panga Justice Khehar, Justices Dipak Misra, M B Lokur, P C Ghose leh N V Ramana te chuan Governor Jyoti Prasad Rajkhowa-an Arunachal Pradesh-a President’s Rule chu India danpui bawhchhiatna a ni a, a chungah hremna lek a nih tur thu an sawi. AP-ah hian January 26 2016 khan Arunachal Pradesh-ah hian President’s Rule hi puan a ni a, hetih hunlaia Congress sorkar chu
ṭhiah a nih bakah, chief minister Nabam Tuki chu paihthlak a ni. Arunachal Pradesh legislative assembly Governor-in a ṭhiat chu dan kalh a nih thu Constitution Bench chuan a tarlang.

Governor J P Rajkhowa hian Assembly session neih hun tura tih chu sawn hmain, speaker thar thlan nghal a ni. President’s Rule puan a nih hnu hian sorkar thar din a nih theih nan hmalak nghal a ni a, Congress MLA hel hruaitu Kalikho Pul leh a thurualpui te chuan sorkar thar an din zui nghal a, February 20 khan Kalikho Pul hi chief minister a ni zui bawk. Hemi chungchang hi Supreme Court chuan a ngaihtuah a, sorkar thar chu ṭhiat a, Congress sorkar din leh tur leh, Nabam Tuki chu chief minister-a la lut leh turin thupek a chhuah a ni.

Nabam Tuki chuan, "Supreme Court chuan thutlukna dik tak a siam a ni" a ti a, "State mipui mai bakah India ram mipuite hmaah dikna chuan ro a rel ta a ni. Congress MLA te nen hmalak dan tur kan sawiho nghal dawn a, kan hmalam hun tur chu tihchian a ni thuai ang" a ti. Congress Vice-President Rahul Gandhi chuan, "Supreme Court chuan India chu democracy ram a nihzia a tilang chiang a ni; Prime Minister Narendra Modi an democracy a kalpui dan chu a dik lo a ni" a ti. "Nabam Tuki leh a kaihhruai sorkar ka lawmpui tak zet a, Supreme Court-in thutlukna dik a siam avangin lawmthu ka sawi bawk a ni" Rahul Gandhi chuan a ti bawk. Congress hruaitu lawk, Kapil Sibal chuan, "Vawiin hi India ram chanchinah ziahlan a ni reng tawh ang, dikna chuan ro a rel a ni. Governor J P Rajkhowa chu bang thuai rawh se" tiin a sawi. Congress President Sonia Gandhi leh Vice-President Rahul Gandhi te chuan President Pra-nab Mukherjee chu Governor lakah hian zahngaihna lantir lo tura an duh thu an sawi ve bawk.

December 9, 2015 khan Go-vernor Rajkhowa hian Assembly Session, January 14-a neih tura tih chu December 16-ah nei turin thupek a chhuah a, hetih hunlaia Congress Assembly Speaker Rebia chu thlak nghal a ni a, eptu party BJP MLA chuan speaker atan hian an thlang nghal. Hemi chungchangah hian kha tih hunlaia rorel lai Congress party chuan nasa takin an sawisel a, nimahsela kaltlangpui tho a ni. Governor chuan Congress MLA 47 zinga 21 te an hel avangin sorkar chu rorel thei loin a awm a ni a ti a, Arunachal Pradesh chu President's rule-a puang mai tura tiin, January 26 khan puan zui nghal a ni bawk. AP-ah hian Assembly member 60 an nei a, tichuan Congress MLA hel hruaitu Kalikho Pul leh hel dang mi 18 bakah independent MLA phnih leh BJP MLA 11 te chuan sorkar thar an din zui ta a ni.

Nabam Tuki chuan Supreme Court chuan dan hmangin India a chhanhim a ni a ti a, he thutlukna hian India ram chanchin a luah reng tawh ang a ti bawk. "Dan chuan kan dikna chanvo min humsak a, tun hnuah chuan hetiang dan palzutna hi thleng tawh suh se," tiin a sawi. Congress party chuan Supreme Court thutlukna vanga an lawmthu hahipin an sawi a, Modi-a kaihhruai sorkar beih nan an hmang nghal bawk. Supreme Court thutlukna avang hian Congress leh BJP te chu na taka an inbeih zui ngei rin a ni a, media te tuipui ber pakhat a ni chho nghal bawk. AP thubuai ngaihtuahtu Apex court chuan Suprem Court thutlukna hian Arunachal Pradesh mai bakah India rama state dangte pawh a nghawng ngei a rin thu an sawi.

Kumin chhungin Arunachal Pradesh leh Uttarakhand-ah te President’s Rule hi puan a ni tawh. Uttarakhand-ah hian Congress MLA pakua te chu chief minister Harish Rawat lakah an hel a, floor vote neih a nih hnuah Congress chuan ro a rel chhunzawm leh a ni. Senior advocate leh Congress Rajya Sabha MP ni bawk Kapil Sibal chuan Suprem Court thutlukna chu lawmawm a tih thu sawiin, India danpui chu rorelna dik hmanga vawnhimin a awm a ni a ti. Delhi chief minister Arvind Kejriwal pawhin Modi kaihhruai sorkarin thil dik lo taka a tih
ṭhin chu hailanin a awm a ni a ti a, SC thutlukna hian Modi-a leh a kaihhruai sorkar-in democracy tichhe thei zawnga an chetna chu titawp mawlh rawh se tiin, Twitter-ah a ziak.

Arunachal Pradesh politics buaina hi nikum November aṭanga inṭan tawh a ni a, rorel lai Congress MLA 47 zinga 21 te chu chief minister Nabam Tuki lakah an hel a ni.