Meghalaya HC-in Nuai 12 chawi turi MeECL ti

Meghalaya High Court chuan kum 2012-a Shillong-a sikul naupang pakhat electric man avanga a thih avangin, he naupang nu hnenah hian Meghalaya Energy Corporation Limited (MeECL) chu cheng nuai 12 pe turin a ti.

He mi chungchangah hian Soma Joshi chu December 9, 2015 khan Court-ah a zualko a ni. February 19, 2012 khan Umshyrpi College-a zirlai Sheetal Joshi (23) chu an chenna, Police Reserve Quarters, Shillong-ah thawmhnaw seng tura in chunga a lawn chu current-in a man hlum a ni. Anita Sangma pawh current hian a man tel a, a taksa 80% zet a kang. Anita Sangma hi MeECL chuan zangnadawm nan cheng 7,65,000 chu amah enkawltu Sukendra Sangma hnenah an lo pe tawh a ni.

Chief Justice Dinesh Maheshwari chuan MeECL te hi Sheetal Joshi nu hnenah zangnadawmna cheng nuai 12 bakah, hun rei tak chhung an ngaihthah avangin cheng 2,67,000 pe tel tura tih an nih thu a sawi. Court chuan thupek chhuah aṭanga ni 60 ral hma ngeia Sheetal Joshi nu hnenah hian pawisa hi pe turin Meghalaya Energy Corporation Limited chu a hriattir a, thubuai ziahluh hun December 9, 2015 aṭanga chhuta an pawisa pek tur kum khata a punna 6% chu pe tel turin thupek a chhuah a ni.