Manipur-ah total lockdown puang leh mai thei : CM

Manipur  chief minister N. Biren Singh chuan lockdown thlahdul a nih hnuah an state-ah Covid-19 kai an pung chho leh nasa tih sawiin, state pumah total lockdown puan leh a ngai mai thei a ni, a ti. Hemi chungchangah hian sorkar laipui an rawn mek tih a sawi bawk. 

CM chuan an state-ah hri leng chu mipuiah a darh tawh ngei nia a lan thu sawiin, hri kai an pun chhoh zel avangin hri darh tur venna atana kar eng emaw zat chu total lockdown puan leh mai ṭhaa an hriat thu a sawi a, hemi rual hian sorkar laipui thurawn erawh an nghah tur thu a sawi thung. Hemi rual hian state puma total lockdown puan chuan sum leh pai lamah pawh nghawng a nei leh ngei dawn tih a sawi a, ICMR lamin testing kit-te a thlawna a pek tawh loh avangin state sorkar chuan testing kit leh mamawh dangte pawh a lei zel a ngai tawh a ni, a ti. 

Imphal-a chanchinbu mite a kawmnaah Singh chuan hri darh tur venna atana sorkar kaihhruaina a siamte chu mipuite chuan an ngai pawimawh tawk lo hle tih sawiin, tun hnaia an state-a hri darh chak dan chu a ngaihṭhat thlak loh hle a ni, a ti. 

State sorkarin hri kai tamna hmun bikte chu chhinchhiahin, a darh zel tur venna atan heng hmunahte hian total lockdown a nih  tur thu pawh a sawi. Tualchhunga pawl hrang hrangte pawh hri leng dona kawnga sorkar hmalakna chu an theihtawpa pui turin a sawm. 

Chief secretary Dr Rajesh Kumar chuan Ministry of Home Affairs (MHA) leh ICMR-ah lehkha thawnin, an state-a lockdown puan an duh chungchangah an thurawn leh rawtna neihte a zawt a ni. 

Manipur-ah hian Thawhṭanni khan hri kai hmuh chhuah thar mi 315 an awm a, an zingah hian security force mi leh sa 30 an tel. Hri kai hmuh tawh hi mi 15,778 awm tawhin, mi 11,913 enkawl dam an awm tawh a, mi 117 in hripui hi an thihpui tawh bawk. 

Manipur-a zirlai pawl paruk in­telkhawm chuan an state-a Covid-19 leng mek dona kawngah state policy siam phutin Imphal-ah sit-in protest a huaihawt bawk.

DESAM president N.Edison chuan Chief Minister pawh an  hmuh tawh thu leh, an thil phut 12 tarlanna memorandum an thehluh thu a sawi. Edison chuan, "Covid-19 dona kawngah state policy siam turin kan phut a, Covid-19 kaite enkawlna turin damdawi-in lian hrang hrangah khum 500 ruahman tur te, hei bakah hri kai enkawlna tur bik khum 500 awmna hawng tur tein kan ngen a ni," a ti. 

Zirlai pawlte chuan hri kaite enkawltu, doctor-te hnathawh dan enfiah tura IAS officer dahna tur thupek sorkarin a siam chu sut turin an phut bawk. 

Tualchhung media-te chuan Covid-19 test result chungchangah fel tawk lo a awm fo niin an tarlang a, an result negative nia sawia certificate pekte pawh a hnuah an positive tih hriat chhuah leh an awm fo niin an sawi.