Exam paper putruk kaihhnawihah mi panga man an ni

Arunachal Pradesh police hnuaia Special Investigation Team (SIT) chuan Arunachal Pradesh Public Service Combined Competitive Examination (APPSCCE-2014) paper putruk kaihhnawihah mi panga an man.

Mi panga mante hi Arunachal Pradesh Public Service Commission (APPSC)-a official-te vek an ni a, March 18-20 inkar khan man an ni tih SIT Additional SP Amulya Boruah chuan a sawi.

Arunachal Pradesh Public Service Combined Competitive Examination, nikuma neihah khan General Studies II paper a put ru a, hei hian candidate-te chuan exam pumpui chu cancel a, a thara exam buatsaih an phut. Hei bakah hian Commisson member-te bang turin an phut bawk.

Paper putruk vanga lungawi lohna lantirin candidate te hian vawi eng emaw zat nawrh an huaihawt tawh a, chaw ngheia nawrh te pawh an nei a ni. An nawrna avang­in kumin January 8 khan state sorkar chuan he thil thleng hi SIT chhui turin thupek a siam ta a ni.

SIT hi SP Amit Sharma-an a ho a, uluk taka thla thum chhung an chhui hnuah official panga-te hi man an ni ta a ni.