Manipur-ah rangkachak an man

Pathianni khan Imphal-ah sipaiten rangkachak a rûka tawlh ṭhahnem tak an man.

24 Assam Rifles te chuan NH-102, Imphal-Moreh kawngpuia Khudengthabi check post-ah Tata Indica car pakhat chu dapin, he motor aṭang hian rangkachak tlawn, kg 4.325 zet an man. He motor neitu hi Moirangthem Ranjan Meitei niin, Khurai Thoidingjam Leikai-a khawsa a ni a, police-ten an man nghal.

Tarlan danin rangkachak tlawn hi motor petrol tanky chhungah dah ṭhat a ni. Police-te chuan rangkachak hi Myanmar aṭanga rawn tawlh luh nia an ngaih thu an sawi.

Hmun dang, Imphal airport-ah security force te chuan Mohammes Zailabuddin chu a rangkachak nen an man bawk. Zailabuddin hnen aṭang hian rangkachak tlawn 10 zet an man a ni.