Covid-19 vanga thi chhungte hnenah Tripura sorkarin Rs nuai 10 pe dawn

Tripura sorkar chuan  Covid-19 vanga thi chhungte zángnadawmna pekna turin District Magistrate pariatte hnenah cheng vaibelchhe 3.84 a pe chhuak. 

Hripui vanga thi chhungte zángnadawmna  pekna tur hi state scheme peng pakhat  niin, kumin December 31 thleng a huam rih ang. Mahse zángnadawmna dawng tura dilna hi thehluh zel a la nih avangin a sum hi pek chhuah a la ni rih lo.

Kumin May thla khan Tripura-a BJP sorkar chuan Covid-19 vanga thi chhungte hnenah zángnadawmna Rs nuai li pek a nih tur thu a puang a, hei hi a hnuah Rs nuai 10-ah a tipung leh a ni. He ruahmanna a siam hun hi an state-a hri kai an pun chak chhoh lai a ni a, mahse hetih lai hian hripui vanga thi erawh an la awm  lo a ni. 

Hripui vanga thi chhungte chuan state sorkar aṭanga zangnadawmna dawng tur hian dilna an thehlut a, an chhungte thi chu Covid-19 vanga thi a ni ngei tih finfiahnate an thehluh tel a ngai a ni. 

Chief minister Biplab Kumar Deb chuan zángnadawmna pek tur zinga Rs nuai li chu  State Disaster Relief Fund (SDRF) aṭangin pek a ni ang a, a bak Rs nuai ruk chu Chief Minister’s Relief Fund aṭangin pek a ni dawn tih a sawi. 

Hetih lai hian law minister Ratan Lal Nath chuan tun hnaiah National Disaster Management lama thuneitute chuan, mitthi chhungte hnena SDRF aṭangin chhawmdawlna Rs nuai li pek chhauh chu a theih dawn lo tih an hrilh niin a  sawi a, mahse sorkarin a lo tiam tawh angin zángnadawmna  an pek tur zat hi an tidanglam dawn lo tih a sawi. 

Hripui vanga thi chhungte hnena zángnadawmna pek tur hi thawh thuma pek an ni ang. A thawh khatna leh thawh hnihnaah Rs nuai thum ve ve pein, a thawh thumnaah Rs nuai li an pe dawn a ni. 

Tripura-a hian Covid-19 vanga thi hi mi 375 an awm tawh a,  hripui thihpui zat, mortality rate hi 1.13% niin hmarchhak state zingah a sang ber pawl a ni. Mahse ram pum huapa hri vanga thi zat, 1.45% ai chuan a la hniam zawk thung.