Imphal-a bandh-in nunphung tibuai

Manipur-a Muslim-ten tiamchin awm loa bandh an kalpui chuan Imphal leh a chhehvel, Meitei-Pongal huam chhunga nunphung a tikhaihlak nasa hle. Hei bakah hian Imphal east district-a Hatta bial pawh a nghawng.

Manipur-ah hian Mohammed Likaman thah a ni a, hemi thah chung­changah Muslim-te hian Manipur sorkar hian Manipur Muslim-te a en hrangin a ngaihsak lo bik nia hriain tiamchin awm loin bandh hi an huaihawt.

Inrinni khan Thoubal District-a Moijing Area-a Leishangthem Jilla Parishad-ten an chairman Mohammed Abdul Latif hoa an inhmuhkhawm zawh hnu aṭangin bandh hi huaihawt nghal a ni. Hatta bial leh a chhehvel­ah hian bandh huaihawttute hian kawngpui dang chatin, dawr inhawngte chu khar turin an tilui a, an khar luihtir a ni.

Mohammed Likman, kum 27 mi hi March 16 khan a nute khua, Kiyamgei Muslim aṭangin Kiyamgei Urup-ah sakhaw thila an hun hmana tel turin a kal a, a awmna chin hriat zui a ni ta lo a ni. A hnuah Keingang Ahallup bialah thia chhar a nih thu hriat a ni a, a taksaah hian sawisak hnuhma tam tak hmuh a ni. Meitei Muslim-ten tualthahna chhuichiang tura chief minister hnena an thu theh­luh chu ngaihsak a hlawh lo nia ngaiin, bandh hi an huaihawt ta a ni.