Vaihloa chhiah sáng duh lo
Meghalaya Chief Minister Mukul Sangma-an vaihlo leh a kaihhnawihah za zela 7-in chhiah tihsan a nih tur thu a sawi chuan tualchhunga vaihlo leh a kaihhnawiha sumdawngte sawisel a hlawh hle a, chhiah tihsan hian tualchhung sumdawngte a tichhia ang a, ram pawn aṭanga man tlawma lakluh a pun phah ringawt dawn niin an sawi.
Meghalaya-a vaihloa sumdawngte chuan an state chhunga vaihlo leh a kaihhnawiha chhiah tihsan chuan man tlawm zawka Bangladesh leh Myanmar aṭanga vaihlo leh a kaihhnawih chawk luh nasa takin a tipung ngei dawn niin an sawi. Cigarettes-a chhiah tihsan a nih hian ram pawn aṭanga dan loa lutte tan hmun a siamsak mai chauh nia an ngaih thu tualchhung sumdawngte chuan an sawi.
Vaihloa chhiah tihsan hian an state ṭhenawmte angin state-ina hetiang thil aṭanga a sum hmuh a tlem phah ringawt dawn niin an sawi. Tripura-ah hian a hma aiin chhiah hi 35%-a tihsan a ni a, Assam-ah 30%-a tihsan a ni a, tihsan a nih hnu hian vaihlo kaihhnawiha heng state-ina sum a hmuh chu za zela 15-in a tlahniam a ni.
Meghalaya-a vaihloa sumdawngte chuan state chhunga chhiah an tihsan hian an state siam chhuah leh, dân ang thlapa state pawn aṭanga lakluh a titlem a, chutihrual chuan man tlawm zawka Bangladesh leh Myanmar aṭanga lakluh a tipung thung tih an sawi.