Manipur : Imphal West-a inkahnaah mi 2 an thi

Manipur-a Imphal West district-ah Pathianni tlai khan inkahna thlengin mi pahnih an thi a, hliam tuar paruk an awm. Imphal West-a inkahna hi Koutruk, Kadangband, leh Singda hmuna thleng niin Kuki helpawl tih nia hriat a ni.

Koutruk khua beih nan hian drone hman niin bomb thlak nan helpawl hian an hmang tih tarlan a ni. Thi zinga pakhat, Angom Surbala (Kum 31) chu a luah silaia kah niin a fanu kum 12 pawhin hliam a tuar bawk. Hliam tuar paruk zingah hian sipai pahnih leh journalist pakhat an tel.

Helpawlten Pathiannia an beih, Kourtuk khuaa village volunteer-te chu security force thurawn angin ni 10 liam ta khan inhnuhdawhtir an ni a, village volunteer hnuhdawh an nih hnu lawka beih an tawk chu pawi an ti hle tih an tarlang. He khuaa chengte chuan sorkarin a humhim zawh loh avangin hrehawm an ti takzet tih an sawi.

Manipur Home Department chuan Imphal West district-a inbeihna thleng chungchangah hian thuchhuah siamin, inbeihna chu 'pawi rapthlak tak khawihna a ni' an ti a, state chhunga remna derthawng tak an neih tichhe thei a ni an ti bawk. Pawisawi lo leh ralthuam nei lo khaw mite beih an ni chu an dem tih an tarlang a ni.

Manipur sorkar chuan boruak ralmuang a awm theih nan hmalak thuai an tum tih an tarlang. He inbeihnaa pawikhawihtute chu hremna pek ngei an tum a, remna leh muanna an neih theihna daltu a nih theih avangin thil thleng chu an dem takzet tih tarlang.

Manipur MP-in sorkar laipui a dem

Manipur-a Congress MP Bimol Akoijam chuan tharum thawhna thar a thleng leh drone hmanga civil mi chenna hmun beih a ni chuan sorkar laipui dan kenkawh kawnga a hlawhchhamna a tilang tih a sawi. He inbeihnaa thi leh hliamte tan hian sorkar chuan mawhphurhna a la ngam dawn em tiin zawhna a zawt.

Prime minister Narendra Modi leh union home minister Amit Shah te remtih dan ang zelin state sorkar chuan hma an la tih an lo sawi tawh a, thla 15 an buai hnuin mi tam tak an thi tawha, heng mite thisen mawh hi sorkar chuan a phurhna chen a awm tih Akoijam chuan a sawi. Manipur buaina chu a la reh mai dawn lo tih a sawi bawk.