Nagaland : NBPU-in NLTP Act hman zel ṭha an ti

Nagaland sorkarin tun hnaia Nagaland Liquor Total Prohibition (NLTP) Act, 1989 dan ennawn a, siam ṭhat ngai lai a awm a nih chuan tih danglam an tumna chu Nagaland Baptist Pastors Union (NBPU) chuan ṭha an ti loa, NLTP dan chu a ngai anga hman chhunzawm zel ṭha an ti.

NBPU hian thuchhuah siamin, NLTP Act chu kohhran leh tlawmngai pawlten an ngiat chhuah a ni tih an sawi a, kawngzawh leh mipuite nawrna a nasat avanga he dan hi lo piang a ni tih an tarlang. He dan siam danglam emaw hmun ṭhenkhatah hlih emaw a nih chuan khawtlang nunah nghawng ṭha lo a nei thei a ni, NBPU chuan an ti.

NLTP Act hi a hlawhtlin lohna a awm tih NBPU chuan an pawm a, sorkar emaw kohhran emaw dem ngawt theih an ni lo tih an sawi. He dan a hlawhtlin tawk loh chhanah hian dan kengkawhtute leh kohhran lam pawhin an tihtur an tih loh tam tak a awm thu sawiin, zu leh a kahhnawih buaina chingfel turin ṭanrual a ngai takzet a ni, tiin an tarlang.

Nagaland Pradesh Congress Committee (NPCC) pawhin NLTP Act siam danglam tumna chu an duh lo tih an lo sawi tawh bawk. NPCC chuan mipui lam aṭanga nawrna a tam avangin kum 1989 khan Congress kaihhruai sorkar chuan he dan hi a siam a ni tih an sawi. Nagaland sorkarin NLTP Act a tidanglam dawn a nih chuan kohhran leh tlawmngai pawlte rawn hmasa turin an duh tih an sawi bawk.