Arunachal : Siang district-ah hydropower project duh lohna lantir

National Hydroelectric Power Corporation (NHPC)-in Mega Watt 12,500 pechhuak thei tur, Siang Upper Multipurpose Project siam a tum duh lohna Siang district-a chengten kar liam ta Inrinni khan an lantir.

Siang district-a hydropower project siam tum dodalna hi All Adi Welfare Society (AAWS), Siang Indigenous Farmers Forum leh Banggo Students Union (BSU) kaihhruaina hnuaia neih niin, Siang district-a khaw hrang hrang aṭangin mi 600 chuang an tel a ni.

Dite Dime, Parong leh Uggeng khua, Siang district aṭanga tel an ṭhahnem hle a, heng khaw mite hian hydropower project vang hian sawn chhuah an hlauh bakah an eizawnna a tichhe thei tih an sawi. Hemi bakah nungcha leh ramngawin a tuar dawn tih an tarlang bawk.

Nawrh huaihawtte hian Arunachal sorkar leh NHPC chu tihluihnaa survey kalpuiah puhin, pre-feasibility report (PFR) pawh tihluihnaa kalpui a ni tih an sawi bawk. Project-in a nghawng tur, tualchhung mite remtihna tel loin survey kalpui a ni tiin Parong khaw hotute chuan thubuai an lo thehlut tawh a ni.