Assam : Contract teacher 20,000 chuang dah nghet

Assam chief minister Himanta Biswa Sharma-a'n kar liam ta Inrinnia an state chhunga contract teacher 20,000 chuang a ngheta dah an ni dawn tih a puang hnuin, nimin khan Khanapara Veterinary College Field, Guwahati-ah zirtirtu 23,956 hnenah appointment letter pek a ni.

Assam CM chuan zirtirtu an dah ngheh chhan chu state chhunga zirna in hma a sawn theih nana hmalakna pakhat a ni tih a sawi a, Assam education minister a nih lai aṭanga a hmalak tawhna a nih thu a sawi. Education minister a nih lai hian Sarba Shiksha Abhiyaan hnuaiah zirtirtu tam tak lak an lo ni tawh a ni.

Himanta chuan zirtirtu an dah ngheh takte hian zirtirtu ni tura paltlang ngai an paltlang tawh avangin sorkar hnathawk nghet an ni tawh dawn tih a sawi a, tun aṭang chuan hamṭhatna - National Pension System (NPS) leh an lo thi palh a nih pawhin an chhungten an hlawh lak bak zawng leh pension an la thei tawh dawn tih a sawi.