Meghalaya-in sorkar laipui puihna dil

Meghalaya chief secretary MS Rao chuan an state sum dinhmuna a ṭha lo hle tih sawiin, April - October thla inkara central tax share tlakhniamna chu cheng vaibelchhe 727 a ni tih a sawi. 

Chanchinthar lakhawmtute a kawmnaah, Rao chuan Meghalaya sum lakluh hi a tlem avangin central tax share-ah an innghat nasa hle tih a sawi. April-October thla chhunga total budget estimate Rs vbc 3,000 a nih laiin, state-in a dawn chu Rs vbc 2,273 a ni, a ti. Heti zata an sum dawn tur a tlahniam hian an state sum dinhmun a nghawng na hle tih a sawi a ni. 

Sum lama an harsatna tawh chu state sorkarin a thunun theih bak a ni tih sawiin, Chief Secretary chuan, "Chief minister chuan sorkar laipui hnenah ṭanpuina dil turin a aiawh a tir a ni. Financial year kal mek tawp lam thla thumah chuan central tax share pekchhuah hi a ṭhat chhoh tawh kan beisei," a ti. 

Rao chuan state sum dinhmun ṭha lo hle mah se, sorkar chuan a hnathawkte thla hlawh pek kawngah harsatna a nei dawn lo tih a sawi a, mahse arrear-te erawh chu a zavaiin a pechhuak thei rih lo maithei a ni, tiin a sawi bawk.