Meghalaya Deputy Speaker a bang

No-confidence motion hmanga Meghalaya assembly speaker Abu Taher Mondal fiah a nih hmain, Deputy Speaker Sanbor Shullai chu Thawhṭanni khan a bang.

Shullai chuan banna lehkha a thehluhah sorkar tichak tura bang a nih thu a tarlang a, mahse rorellai sorkar erawh thlawp zel a tum thu a tarlang bawk.

Shullai hi Nationalist Congress Party (NCP) MLA a ni a, NCP hian Cong­ress kaihhruai Me­gha­laya United Alliance (MUA) sorkar a thlawp. Member 60 awmna Meghalaya assembly-ah hian NCP chuan member pahnih a nei.

Shullai chuan, "Mimal harsatna avangin Deputy Speaker aṭangin ka bang a, ka ban chhan hi speaker Mondal laka no-confidence motion putluh tur vang a ni lo. MUA sorkar emaw Chief Minister te'n bang turin min phut hran lo," tiin a sawi.

Meghalaya-a eptu party Meghalaya People's Front leh Hill State People's Democratic Party chuan speaker Mondal chu assembly inkhawmah sawihona hun hawng ṭha loah puhin a lakah no-confidence motion an pu lut a, vawiin hian speaker hi House-ah fiah a ni ang.

Deputy speaker a ban tak avangin speaker Mondal chuan vawiina amah fiahna neih turah inkhawm kaihhruai turin MLA pali awmna 'Panel of Chairmen' aṭangin member pakhat a ruat a ngai dawn a ni.

Speaker Mondal chuan vawiina assembly inkhawm kaihruai tur, chairman a la ruat loh thu sawiin, Deputy Speaker Shullai banna chu 'assembly conduct of business' tlawhchhanin a pawmsak thu a sawi bawk.

Congress kaihhruai MUA sorkar hian Congress MLA 29 a nei a, NCP MLA pahnihin an thlawp bakah Independent MLA 11-in an thlawp bawk.