Hmeichhiate tan Assam him lo

Assam chu hmei­chhiate tana a him tawk loh thu kum 2005 leh 2014 inkara record-in a tarlang.

Assam Agriculture Minister Rockybul Hussain chuan assembly in­khawmah hmeichhiate chunga pawilkhawihna thleng chungchang tarlangin, kum 2005 leh 2014 inkara record hi a tarlang.

Kum 2005 - 2014 inkar hian Assam-ah hmei­chhia 16,000 dawn pawng­sual an ni a, inneih thilchhawm (dowry) kaihhnawihah mi 1,400 thah an ni a, pawl leh mimal te'n pawikhawihtua rinhlelh an chhuina (witch-hunt) kaihhnawihah mi 120 thah an ni bawk.

Hussain chuan assembly-a zawhna a chhanah kum 2005-2014 inkar hmeichhe 68,329 chu kutthlak an nih thu a sawi a, mi 15,931 chu pawng­sual an nih thu a sawi bawk. Pawngsual tawk zinga mi 78 chu an thi zui a, hmeichhe 1,388 thihna thlentu chu inneih thil­chhawm kaihhnawih a ni.

Kum 2005 khan hmei­chhe 2,047 chu pawngsual an ni a, kum 2014 khan hmeichhe 14 chu pawngsual an nih hnuah an thi zui a ni. Kum 2005 khan inneih thilchhawm kaihhnawihah hmeichhe 99 chu thah an ni a, kum 2014 khan inneih thil­chhawm vanga thi hi mi 205-ah a pung a ni.

Kum 2012 khan pawng­­sual hnua thi an tam ber a, mi 15 an thi a, kum 2014 khan pawngsual a thleng tam ber a, thubuai 2,047 ziahluh a ni.

Witch-hunting kaih­hnawihah kum 2011 khan thi an tam ber a, mi 31 thah an ni.

Hmeichhiate te laka tharum thawhna thubuaiah kum kaw kalta chhung khan mi 47,298 man an ni a, police te chuan mi 44,877 lakah charge-sheet an thehlut a ni. Heng zinga mi 1,385 chu court-in a hrem tawh a, a bak zawng chu an thubuai ngaihtuah mek a ni.

Hussain chuan kum 2005 leh 2014 inkar hian hmeichhe rukbona thubuai 26,464 ziahluh a nih thu a sawi bawk a, heng zingah hian pawikhawihtu 13,568 chu man an ni, a ti.

Hetihlai hian kum 2014 chhung khan Assam-ah civilian mi 195 leh police personnel pali chu helho kuta an thih thu Minister Hussain chuan a tarlang bawk.

Agriculture Minister Hussain chuan helho kuta thi, police pali chhungte hnenah zângnadawmna nuai 20 ṭheuh pek an nih thu leh an chhung­te pakhat ṭheuh sorkar hna pek an nih thu a sawi bawk. Civilian thi chhungte hi state sorkar chuan zângnadawmna cheng nuai nga ṭheuh a pe bawk a, hei bakah hian sorkar laipui chuan Central Scheme for Assistance to Civilian Victims of Terrorist, Communal or Naxal Violence kal­tlangin cheng nuai thum ṭheuh a pe bawk.

Assam-ah hian helpawl pariat chu an la active thu Minister chuan a sawi bawk a, chung te chu- ULFA (I), NDFB(S), KPLT, KLO, HuM, MULTA, CPI (Maoist) leh JMB (Module) te an ni.

Helpawl 13 chuan inkahhai thuthlung an nei mek a, heng zinga a langsar zualte chu- ULFA (pro-talks), NDFB (P), NDFB (RD) leh AANLA te an ni.

Helpawl active pariatte hian kum 1991 aṭanga vawiin thlengin tharum thawha, pawikhawihna vawi 6082 an thlen tawh a, pawikhawihna thleng 3632 chu ULFA helte thlen a ni.

Kum 1991 aṭangin helpawl pariatte hnen aṭang hian silai 2059 an man tawh a, heng zinga 1376 chu ULFA helte silai a ni.

Helpawl hruaitu leh hel, mi 19, 939 chu kum 1991 aṭang khan man an ni tawh a, heng zinga 14982 hi ULFA hel an ni.

Tuna helpawl la active zingah NDFB(S) chuan member a nei tam ber a, mi 250-270 inkar an awm. ULFA chuan member 240 vel a nei thung.