Governor-in ‘Swachh Bharat’ mission a tlangzarh

Prime Minister Narendra Modi-a'n India ram tihthianghlimna atana programme a duan, ‘Swachh Bharat’ mission chu Nagaland Governor P.B Acharya-a'n Thawhṭanni khan Nagaland khawpui, Kohima-ah a tlangzarh.

Governor Acharya chuan ‘Swachh Bharat’ mission-a brand ambassador-ah ruat a ni chu lawm­awm a tih thu sawiin, he hmachhawp lian tak hi India-in a ngaihpawimawh a ṭul thu leh thianghlimna leh faina hmanga India hmel thlak danglam a pawimawh thu a sawi.

‘Swachh Bharat’ mission hmang hian kum 2019-ah India ram chu ram thianghlim leh fai nihtir tum a ni a, mission hnuaiah hian kum nga chhungin inthiarna vaibelchhe khat siam tum a ni bawk.

Acharya chuan university, bank leh sumdawng liante chuan mission hnuai­a vantlang inthiarna siam turah a ṭul anga sum leh pai thehchhuak turin a sawm a, Clean India Mission chu mitinte mawhphurhna a ni, a ti.

Nagaland Governor chuan sumdawnna hmunpuiah vantlang inthiarna awm mah se hmeichhiate inthiarna bik a awm ṭhin loh thu a sawi a, mission hlawhtlin nan mi zawng zawng inhnamhnawih turin a sawm bawk.

Governor chuan India ram state 29 zinga inthiarna neih ṭhat­ah Nagaland a ti-ṭha ber a ni chu lawmawm a tih thu a sawi bawk a, Jan Dhan Yojana scheme hnuai­a thingtlang mite'n cheng khat mah nei lo bank account hawng a, cheng nuai khat hu insurance an nei thei chu lawmawm a tih thu a sawi bawk. Hetiang hamṭhatna hi mipuite'n an mamawh a ni, a ti.

Nagaland Governor Acharya chuan Gujarat-a mi pakhatin Kohima-ah vantlang inthiarna 400 siam a inhuam thu sawiin, inthiarna siamna atan Angami mite chu phal taka ram thawh turin a ngen nghal.