Court thutluknaah buaina tur a awm lo - Kalikho Pul

Supreme Court-in Arunachal Pradesh-ah Congress sorkar din leh tura Nilaini-a thupek a chhuah hnuah Chief Minister ṭanglai Kalikho Pul chuan buaina tur a awm lo a ti.

Pul chuan kan sorkar hi a ding reng dawn a, chutiang tur pawh chuan thlawptu kan ngah tawk a ni a ti. Assembly-ah floor test buatsaih nimahsela member kan ngah tawk avangin sorkarna hi kan chang chhunzawm dawn a ni, Court thutlukna chu a sorkar chuan ngaihtuah ṭha leh tura an zualko leh tur thu a sawi. Supreme Court chuan Nilaini khan thupek chhuahin Arunachal Pradesh-ah hian Congress sorkar a din leh a, hei vang hian mi tam tak chuan Court thutlukna hian India rama Democarcy a vawnghim a ni an ti a, Congress sorkar lawmpuina thu an sawi chhuak hlawm.

Constitution bench-a judge panga Justice JS Khehar, Dipak Misra, Madan B Lokur, Pinaki Chandra Ghosh leh NV Ramana te chuan December 15, 2015-a paihthlak tak Congress sorkar chu ding leh turin thutlukna an siam a, Nabam Tuki chu Chief Minister a ni zui bawk. Apex court chuan Governor Jyoti Prasad Rajkhowa-an state assembly session, January 2016-a neih tur December 2015-a a sawn hma chu thil dik lo a nih thu a lo sawi tawh a, Governor chet dan hian India danpui a kalh niin Courth thuchhuah chuan a tarlang.

Nilaini-a Supreme Court thutlukna siam avang hian Assam chief minister hlui Tarun Gogoi, Assam Assembly opposition leader Debabrata Saikia leh Assam Pradesh Congress Committee (APCC) te chuan Arunachal Pradesh Governor JP Rajkhowa chu bang nghal tura an phut thu an sawi.

APCC thupuangtu Ramen Chandra Barthakur chuan, "BJP sorkar-in India Democracy zah lo taka a palzut mek chu Supreme Court chuan tihtawpsak mawlh rawh se, Governor JP Rajkhowa chet dan hi thil tenawm tak a ni. Arunachal Pradesh Congress duhsakna kan hlan e" tiin a sawi. Assam Chief Minister hlui leh Congress hruaitu hlun ni bawk Tarun Gogoi chuan Nabam Tuki leh a kaihhruai sorkar duhsakna a hlan thu a sawi ve bawk.

Pul chuan Court thu-tlukna chu ngaihtuah nawn leh tura hma a lak nghal thu sawiin, Tuki chuan majority a chang pha dawn lo niin a sawi. Hetihlai hian Minister of State for Home Kiren Rijiju chuan Supreme Court thutlukna siamah hian sorkar laipui chu a inrawlh loh thu leh Governor chet danah thurawn an pek loh thu a sawi. BJP spokesperson Nalin Kohli pawhin Court thutlukna avanga an buai loh thu leh Congress party chet dan aṭanga zir tur an neih a hriat loh thu a sawi.

Chief Minister Nabam Tuki chuan New Delhi a pan nghal a, an hma lam hun tur party hruaitu lawkte a sawipui rin a ni. Delhi aṭang a let veleh party meeting an neih nghal tur thu sawiin, chak taka hmalak a nih tur thu a sawi. Tuki hian Court thutlukna siam hi a copy a la dawng lo nia sawi a ni bawk.