HDFC Bank rawktu mi 14 man tawh An zingah Bank Staff pali an tel

Manipur Police te chuan Thawhlehni khan July 4-a HDFC Thoubal branch rawk an chhui zelnaah mi 14 an man tawh bakah, rangkachak kg 4 leh pawisa fai cheng nuai 17 an hmu let tawh tih an sawi.

Thoubal SP K Radha-shyam chuan Bank rawktu an man 14 zinga pali te chu bank staff an nih thu a sawi. Rangkachak an hmuh let tawh zawng zawng chu kg 4.697 a tling tawh tih sawiin, hei hi market rate-ah chuan vaibelchhe 1.30 hu a ni. Pawisa fai an hmuh let tawh zat hi cheng 7,06,840 a tling tawh bawk. SP chuan he inrawkna thlenga inhnamhnawih zinga bank staff an tel hian ngiahtuah a tithui hle a, an zinga hotu ber Mutum Gandhi chu man tuma zawn mek a nih thu a sawi.

HDFC Thoubal branch rawk chhuinaa an man Suresh, Alias Ibohal, Laishram Jayanta Singh, Thiyam Munan, Thiyam Suren, Nahakpam Ramesh, Atang tia koh leh Thiyam James Singh te hi Charangpat Mayai Leikai-a cheng an ni. SP chuan an hotu ber chu Mutum Gandhi a nih thu man tawh te inpuanna aṭangin an hre tawh a, midang he inrawknaa inhnamhnawih midang pawh zawn mek an nei tih a sawi. Bank staff an man te hi cashier Ningthoujam Gokhale Singh (30), Deputy branch manager Khagembam Birla Singh (34), Housekeeper Okram Nando Singh (25) leh Security guard Laishram Jayanta Meitei (24) te an nih thu SP chuan a sawi bawk. Gokhale chu he rukruk rawt chhuaktu ber leh a bultumtu a ni a, Gandhi nen hian ruahmanna hi an siam a ni. He thil thleng avang hian Gandhi nupui chu man tel a, pawisa fai leh rangkachak thukruah puh a ni.

July 4 khan HDFC Thoubal branch hi misualte hian luhchilhin hnathawk te chu ralthuam hmangin an vau bet a, pawisa fai leh Bank hna-thawk ho rangkachak te chu an chhuhsak a, a hnuah car hmangin an tlanchhe zui nghal a ni. Rangkachak te hi dilah paih luh a ni a, a hnuah police ten an man zui a ni.