Meghalaya Police ten Cyber Cell hawng

Meghalaya police te chuan Thawhlehni khan Cyber Cell an hawng thar a, hei hi internet hmanga pawikhawihna hrang hrang ven nana din a nih thu an sawi. Cyber Cell tihchak nan hian Cyber police station, Meghalaya Police headquarters, Shillong-ah din a nih tur thu an sawi bawk.

Director General of Police (DGP) S.K Jain chuan Thawhlehni khan Cyber Cell hi a hawng a, nimin aṭang khan hman ṭan a ni. He cell hi police mai bakah mipui ten an chhawr ve theih nan helpline number leh email ID te tarlan a ni a, hei hian nasa taka state chhunga cyber crime chu ven theih beisei a nih thu S.K Jain chuan a sawi. DGP chuan social media hmanga sualna chu a pun thu sawiin, media hmanga intihhmingchhiatna te, thlalak hmanga intihmualphona te leh kawng hrang hranga sualna punlun zel tur chu ven a ngaih thu a sawi. Cyber police station din thuai tura hmalak mek a nih thu sawiin, thawktu mi 24 an awm dawn a, hmanraw changkang tak hmanga thuam an nih tur thu DGP S.K Jain chuan a sawi bawk.