ST status chungchang House-ah sawi ho
Assam-a hnam peng paruk te hnena Schedule Tribe status pek chungchang chu Thawhlehni khan assembly inkhawmah sawi ho a ni a, member te chuan sorkar laipuiin a pawmpui loh an hlauhthawn thu an tarlang.
Congress MLA Bhupen Borah chuan ST status pek chungchang hi Zero Hour-ah sawi chhuakin all-party committee palaite chuan hnam peng paruk te hnena ST status pek tur chungchang chu nikum khan Delhi-ah Union Home Minister Rajnath Singh leh Union Tribal Affairs Minister Jual Oram te an sawipui tawh thu a sawi bawk.
"Union Minister pahnih chuan kan thil thlen chu bawhzuisak min tiam a, Union Tribal Affairs Minister Oram chuan amah ngei Assam-a lo kalin hnam hrang hrangte dinhmun a zirchian tur thu a sawi a ni," tiin Borah chuan a sawi a, mahse report hnuhnung bera a lan danin sorkar laipui chuan hnam peng paruk te hnenah tribal status a pe lo mai thei a ni, a ti.
"ST status pek phu, hnam peng paruk te hnena tribal status dansak chu rorelna dik chhuhsakna a ni a, heng hnam peng paruk te hi midang lak aṭangin kan tihrang tulh tulh dawn a ni," a ti.
Borah chuan ST status chungchangah hian state sorkar hmalak tum dan Speaker hnenah a zawt bawk.
BJP MLA Ranjit Das chuan Borah thu sawi hi chhangletin, sorkar laipuia BJP kaihhruai, NDA sorkarin Assam-a hnam peng paruk te ST status dilna a hnawl thu a la chhuah loh thu a sawi. "Chanchinbu ṭhenkhatin an report vang a ni a, sorkar laipui chuan hemi chungchang hi a la sawi chhuak lo a ni," a ti.
State Minister for Welfare of Backward Classes Bismita Gogoi pawhin tribal status pek leh pek loh tur chungchangah sorkar laipuiin engmah a la sawi chhuah loh thu a sawi a, chanchinbu ṭhenkhat kaltlangin tribal status pek an ni lo mai thei tih kan hre chauh a ni, tiin thudik a nih leh nih loh finfiah thuai an tum thu a sawi bawk.
Speaker Pranab Gogoi chuan media report behchhanin engmah official-a puan theih a nih loh thu sawiin, "Hemi chungchang hi a pawimawh a, finfiah a nih chuan assembly-in hmalak zel dan tur a ngaihtuah ang," a ti.