Manipur People’s Party-in MRVT & MW Bill hnuhkir phut

Hmarchhak biala ṭual­to party hlun berte zing a mi, Manipur People’s Party (MPP) chuan state sorkarin pemlutte khuahkhirhna atan dan thar a pass, Manipur Regulation of Visitors, Tenants and Migrant Workers (MRVT & MW) Bill 2015 hnuhkir phutin, Thawhlehni khan Imphal-ah sit-in protest a huaihawt a, Manipur-ah inner line permit (ILP) system kalpui a phut bawk.

MPP nawrh huihawt­ah hian party president N Sovakiran leh party advisor L Chandramani te pawh an tel.

Sovakiran chuan, "MRVT & MW Bill chuan Manipur leilung fate humhalh­na tur emaw pemlutte khuahkhirhna lam hawi engmah a ken tel loh avangin a rang thei ang bera hnuhkir kan phut a ni," a ti.

Party advisor Chandramani pawhin thu sawiin, ILP system chu hmarchhak state dang pathum- Arunachal Pradesh, Mizoram leh Nagaland-ah kalpui a nih thu a sawi a, ILP system chauhin pemlutte lak aṭangin state leilung fate a humhalh theih a rin thu a sawi.

MPP chuan MRVT & MW Bill chu pawmpui lo tura ngenna Governor KK Paul hnenah an thehlut nghal.

MRVT & MW Bill hi March 16 khan Manipur assembly chuan a pass a ni.

"Bill thiltumte leh thil tarlante chu mipuite thil phut ang a ni lo a, a chiang lo a ni," tiin MPP memorandum chuan a tarlang a, Bill chu member te'n house-ah an sawi ho tam tawk loh bakah hmanhmawh taka pass a ni, tiin a tarlang bawk.