Manipur sorkarin sericulture scheme a tlangzarh

Manipur sorkar chuan silk tharchhuah tihpun tumin Thawhlehni khan sericulture scheme pa­hnih a tlangzarh.

Scheme pahnih - Manipur phairuam district-a cheng mite tana sericulture project ruahman, Phase II leh tlang mite tana Integrated Sericulture Development Project ruahman chu Union Textiles Minister Santosh Gangwar-a'n a tlangzarh a ni.

Union Textiles Ministry chuan Manipur Sericulture Project Phase-II hi North East Region Textile Promotion Scheme (NERTPS) hnuai­a kalpui atan a pawmsak a, cheng vaibelchhe 149.76 hu project tur niin, Textiles Ministry chuan vaibelchhe 126.60 a tum ang. Project hi kum thum chhung- 2014-15 aṭanga 2016-17 thleng kalpui tura ruahman a ni a, Manipur phairuam district-a mulberry sericulture development programme kalpuina project a ni.

Kum 2014-15 chhunga sorkar laipui senso tur cheng vaibelchhe 30.08 chu state sorkar hnenah a pe tawh.

Project kalpui chhung- kum thum chhungin cheng vaibelchhe 159.38 hu mulberry raw silk metric tonne 638 tharchhuah hman beisei a ni. Project aṭang hian kum khatah cheng vaibelchhe 50.62 hu, mulberry raw silk metric tonne 203 thar­chhuah hman beisei a ni.

Project hnuaia ṭanpuina dawngte chu mulberry chinna tur te, silk pangang khawina tur te ngaihtuahsak an nih bakah training leh thil ṭul dangte ngaihtuahsak an ni ang. Kum khatah loneitu pakhatin ram acre khata zau aṭangin Rs 45,000 vel a lalut thei tura chhut a ni.

Thawhlehnia Manipur tlawhtu, Union Textile Minister Gangwar chuan Imphal West, Lamboi Khongnangkhong-a Apparel & Garment Making Centre sakna tur lungphum a phum bawk.

Gangwar chuan Apparel & Garment Making Centre dinna senso chu sorkar laipuiin a tum vek tur thu a sawi a, centre chuan unit pathum a neih tur thu leh unit khatah khawl 100 zel dah a nih tur thu a sawi bawk. Project chu hmarchhak biala textile industry changtlung tak a awm theihna atana ruahman a nih thu a sawi.