Tripura HC-ah thubuai chinfel loh awm zat a tlahniam
Tripura High Court chuan kum hnih kalta khan thubuai 2,565 a chingfel a, hei vang hian kum nga chuanga upa thubuai chinfel loh zat a tlakhniam phah hle.
Chief Justice Deepak Gupta chuan he thu hi Thawhlehni khan sawiin, kum 2013-a HC din a nih ṭumin kum nga chuanga upa thubuai la chinfel loh 30% chuang a awm a, mahse nikum October khan heng thubuai chinfel loh te hi 6%-ah a tlahniam a ni. Mahse thla nga ralta khan kum nga chuanga upa thubuai chinfel loh hi 10%-ah a sang chho leh ta a ni, a ti.
Justice Gupta chuan Tripura mipui tam zawk chu dan hnuaia an dikna leh chanvo la hrechiang loa a ngaih thu a sawi bawk a, dam hremite leh khawtlanga pawl hrang hrangte chu khawtlang nun siamṭhat nan nasa zawka Public Interest Legislation (PIL) hmang ṭangkai turin a sawm bawk.
Tripura HC chu India ramah IT-enabled-High Court anga hriat a nih tawh thu sawiin, India rama a hmasa ber atan thubuai thehluttute leh insawifaih ngaite tan SMS service siam a nih thu a sawi.
"SMS service chu High Court thubuai kaihhnawihah chauh ni loin Tripura-a lower court 64-a 57-ah hman a ni bawk. Court chungchang information lakna atana thubuai thehluttute'n advocate te chungah innghat ringawt loin SMS service hi nasa takin an chhawr ṭangkai tawh a ni," a ti.