Union Cabinet-in ST status chungchang ngaihtuah dawn
Assam sorkarin hnam peng paruk te hnena Scheduled Tribe (ST) status pek a tum chungchangah thutawp siamna tur chu Union Cabinet-in a ngaihtuah dawn.
Assam-a hnam peng paruk te hnena Schedule Tribe status pek chungchang chu Thawhlehni khan state assembly ṭhutkhawmah sawi ho a ni a, member te chuan sorkar laipuiin a remtih loh an hlauhthawn thu an sawi.
Ministry of Home Affairs (MHA) official chuan Assam-a hnam peng paruk te hnena tribal status pe tura state sorkar ngenna chu sorkar laipuiin a la hnawl loh thu sawiin, sorkar laipuiin a ngun takin a bawhzui mek a ni, a ti.
Official chuan ST status pe tura rawtna chu MHA-in a bawhzui mek tih a sawi a, rawtna a siamte chu Cabinet Secretariat-ah an thehluh thuai a beisei thu a sawi.
ST status chungchang chu Union Cabinet-in a ngaihtuah hnuah thutawp a siam ang, tiin official chuan a sawi bawk a, cabinet-in a remti a nih chuan Assam hnam peng paruk te hnena ST status pekna chungchang chu chinfel nghal a ni ang, a ti.
Hetihlai hian official chuan ‘tea tribes' hnuaia hnam peng awm zawng zawngte chu ST status pek theih an nih loh thu a sawi bawk. Assam-a 'tea tribes' hnuaia hnam peng 97 zingah hnam peng 26 chauh chu tribal status pek theih an ni a, hnam 26 te hi India ram hmun dangah pawh ST status pek an ni.
Assam-a hnam peng paruk- Koch-Rajbongshi, Moran, Motok, Tai Ahom, Chutia leh tea tribe te chuan ST status an phut a, state sorkar chuan hemi pawmpuina atan assembly-ah resolution a lo pass tawhin, sorkar laipuiah a lo thlen tawh a ni.