PWD hnathawh House Committee-in chhui chiang ang: Assembly Speaker

State Public Works Department (PWD) kawngpui siam chhe lutuk chu a ngaihmawh thu Assam assembly speaker Pranab Gogoi chuan sawiin, House Committee dina thil fel lote chhuichian a nih tur thu leh harsatna chingfel tura bawhzui a nih tur thu a sawi.

Inkalpawhna kawngpui chungchanga AIUDF MLA Gopinath Das-a'n house-a zawhna a siam hnuah sawi hona neih zui nghal a ni a, speaker Gogoi chuan kawngpui siamna project a hun taka zawh hman loh leh kawng siam dan chhe lutuk chu kalphung pang­ngai tak a ni tawh a ni, a ti.

"Kawngpui project ṭhenkhat chu hnathawh ṭan theih a nih hnuin kum khat dawn te chawlhsan a ni a, hnathawhna senso hniam lutuka tender chhuah hian hna thawh a tihchhiat phah bawk. Hnathawktute hna pe tawh lo tura dan ringawt chu harsatna chinfelna a ni lo a, hei vang hian a ṭobul aṭanga chhui turin House Committee ka din dawn a ni. Tun dinhmunah eng tin nge PWD te kan rin theih ang?" tiin Speaker chuan a sawi.

AIUDF MLA Das-a zawhna a chhannaah PWD Minister Ajanta Neog chuan PWD-in CVC guideline a zawm ṭhin thu a sawi a, tender chhuah nan e-tendering system an kalpui thu a sawi bawk.

BJP MLA Dilip Moran zawhna chhangin PWD Minister chuan Prime Minister’s Gram Sadak Yojana (PMGSY) hnuai­ah kum 2013-14 chhung khan kawngpui kilometre 957.96 leh kum 2014-15, February 28 thleng khan kawngpui kilometre 742.85-a thui black top a nih thu a sawi.

AIUDF MLA Gul Akhtara Begum pawhin PMGSY hnuaiah Dhubri district chu ngaihthah a ni, a ti a, sorkar kum hnih ralta khan district chhung­ah kawngpui kilometre 11-a thui leh kilometre 6.8-a thui chauh black top a nih thu a sawi.