Readymade thuamhnaw siamna NE-ah din dawn

Sorkar laipui chuan hmarchhak state pariata hmeichhiate tana hnathawh tur siam nan leh textile industry tihchangtlun nan state tinah readymade thuamhnaw siamna hawn a tum thu a tarlang.

Tripura-a handloom and handicrafts department official chuan he thu hi sawiin, readymade thuamhnaw siamna hmun, ‘Apparel and Garment Unit’ (AGU) hawn nan Union Textile Ministry chuan state tinah cheng vaibelchhe 18 a pek tur thu a sawi.

Sorkar enkawl, National Building Constructions Corporation chuan hmarchhak state pariat- Assam, Arunachal Pra­desh, Manipur, Meghalaya, Nagaland, Mizoram, Sikkim leh Tripura-a AGU hawn turte hi a buaipui ang.

Tripura official chuan garment unit pakhatah hmeichhia 300 vel zelin hna an thawk thei dawn a ni, a ti.

"Readymade thuam­hnaw te chu ṭhenawm ramah thawnchhuah a ni ang a, unit zawng zawngte hi entreprenuer te'n an enkawl ang," tiin official chuan a sawi bawk.

Apparel and Garment Unit hawn thar tur hi state leh sorkar laipuia Textile Ministry-in an enpui ang a, mahse an nitin hnathawh danah erawh inrawlhna a nei lo ang. AGU te hi an hlawhtling a nih chuan hmarchhak state hrang hranga district thlan bik­ah a tahtawla hawn belh zel a ni ang.