M'laya Assembly aṭangin journalist te chhuak tau
Chief Minister Mukul Sangma-a'n Meghalaya-a journalist te chu hel pawlte tlangau tia a sawi avanga an lungawi lohna lantir nan Nilaini khan assembly house aṭangin journalist te an chhuak tau.
Chief Minister chuan assembly inkhawmah journalist te chungchang hi sawi chhuakin, journalist te chu hel pawlte thuthar thehdarhsaktu leh chanchinthar an tihchhuah man laah a puh a ni.
Mukul chuan a thu sawi chu sawi chhuak lo thei lo dinhmunah a din thu a sawi a, hetianga chanchinthar thehdarh hi mihring dikna chanvo palzutna a nih bakah India danpui bawhchhiatna a ni, a ti.
Meghalaya-a editor ṭhahnem takin tun hnaiah editorial column tiruakin chanchinbu an chhuah a, hemi chungchang hi eptute chuan kar kalta Zirtawpni, March 20 khan house-ah sawi ho an phut a, mahse Speaker-in a remti lo a ni.
Hetihlai hian Meghalaya Editors and Publishers Association chuan Chief Minister chu inlaichina ṭha an neih theihna atana ngaihdam dil turin an phut.