Tripura minister-ten Hri kai enkawlna hmun enfiah ṭhin dawn

Tripura khawpui, Agar­tala-a Gobind Ballabh Pant (GBP) COVID-19 hospital-a hri kai enkawlna kawngah health department hnuaia officer leh health worker-te an inthlahdah nia sawi a awm avangin, sorkar chuan he hmuna hri kaite enkawl an nih dan chu cabinet minister-ten an enfiah ṭhin dawn tih a sawi. 

State sorkar thupuangtu, education minister Ratan Lal Nath chuan sorkarin hri vanga an state-a thi an tam chu a vei hle tih sawiin, hemi rual hian nunna chhan tum hian doctor leh thuneitu lamte chuan theihtawp an chhuah reng a ni, a ti. 

Nath chuan, GBP hospital-a Covid-19 ward-a official ṭhen­khat duty inthlahdah nia sawi chungchangah complaint eng emaw zat an dawn thu leh thi zat pawh an pun chak thu a sawi. Thawktute inthlahdah avangin tumah an thi tur a ni lo tiin, hei vang hian cabinet minister-te chu he hmuna damlote enkawl dan an in vil chhawk dawn tih a sawi a ni. Complaint hi a la awm chhunzawm zel a nih chuan minister-te pawh damdawi-inah hian an in riah chhawk mai tur thu a sawi bawk. 

Tripura-ah hian nimin thleng khan sample 2,92,269 lak ni tawhin, hri kai hmuh chhuah hi 14,524 an awm tawh a ni. Hri kai zinga 8,483 chu enkawl dam ni tawhin hri kai mek 5,884. State positive rate hi 4.89% niin, recovery rate hi 61.40% a ni a, hri thihpui rate chu 0.97% a ni a, thihpui hi mi 134 an awm tawh a ni. 

 Agartala Municipal Corporation (AMC) area-ah hri kai leh hri thihpui hi an pung chak hle a, hei vang hian state sorkar chuan sorkar laipui hnenah expert team tir turin a ngen a, an state-a hri darh zel tur venna kawnga ruahmanna te siamsak turin a ngen. 

Minister Ratan Lal Nath chuan sorkai laipui puihna an dil thu hi Civil Secretariat-a media mite a kawmnaah sawi­in, union ministry of health and family welfare chuan expert team a tir thuai dawn tih a sawi. "Hri kai thar leh thihpui an pun zel avangin state cabinet chuan kartawp apianga curfew puan a duh a, mahse union ministry of home affairs lamin min la pawmpui lo a ni. Mahse hri leng hian ziaawm lam a pan loh chuan weekend curfew chu kan puan ngei a la ṭul ang," a ti.