Manipur-ah Covid-19 vangin mi pathum thih belh leh

Manipur state-ah kar liam ta Inrinni khan Covid-19 vangin mi pathum an thih belh leh a, hripui vanga thi hi mi 35 an awm ta a ni. 

Additional health director Dr K Sasheekumar Mangang chuan Inrinnia hri vanga thite hi hmeichhia kum 60 mi leh mipa, kum 60 leh 39 mi an ni tih sawiin, Imphal damdawiina enkawl an nih thu a sawi. 

Hemi ni vek hian hri kai hmuh chhuah thar mi 90 an awm a, an zingah hian security force mi leh sa 24 an tel. Tualchhung mi hri kai hmuh zinga 66-te chu hmun danga chhuahna  nei lo a, tualchhung aṭanga kai an ni. 

Manipur-a hri kai hmuh chhuah tawh hi 6,699 an tling tawh a, an zingah hian Central Armed Police Force (CAPF) mi leh sa 1,653 an tel. Hri kai zinga 4,899 chu enkawl dam an ni tawh. 

Covid-19 kai zinga mi, social welfare minister Nemcha Kigpen chuan kar liam ta Zirtawpni hian hri a kai tawh lo tih sawiin, a sample test chu a negative tawh tih a sawi. 

August 25 khan kum 57 mi, minister hian Covid-19 a kai tih hriat a ni a, enkawl a nih hnuah Zirtawpni khan a test hi a negative tawh a ni.