Kuki pawlin inbeihna atana drone hmanga puhna an pha

Manipur-a Kuki hnam pawl lian ber, Kuki Inpi Manipur leh Kuki Students' Organisatoion chuan state sorkar leh police-ten Pathiannia drone hmanga Meitei khua beitute Kuki helpawl nia an sawi chu pha in, thu dik lo a nih tih an sawi.

Kuki pawl lian ber, Kuki Inpi Manipur leh Kuki Students' Organisation chuan thuchhuah siamin, Pathiannia Imphal West-a Koutruk khuaa thil thleng chu Meitei helpawl leh state force-te ṭangdun leh, Kuki-Zo village volunteer-te inbeihna a ni tih an tarlang.

" Kuki-Zo te puhna hi thu dik lo, finfiahna pawh awm lo a ni. Meitei zawkin drone hi an hmang a ni. Hetianga home department lamin thuchhuah an siam hi mipuite leh media mite rilru tihbuai an tumna a ni," tiin Kuki Inpi information secretary, Janghaolun Haokip chuan a sawi. Drone hman chungchang hi tun hnaia chief minister N Biren Singh audio leak vanga mipui rilru lakpen an tumna mai niin an puh.

Kuki Students' Organisation pawhin drone chu Meitei lamin Kuki chenna bial bomb-na atan a hman tum a ni a, mahse buffer zone bula duty Kuki village volunteer-te chuan kap thlain, security force hnenah an hlan niin an tarlang ve bawk.

Manipur police-te chuan Pathiannia drone leh rocket propelled grenade hmanga Koutruk khaw beitute chu Kuki helpawl niin an sawi thung. He inbeihna thlengah hian mi pahnih an thi a, hliam tuar 10 an awm bawk a ni. Thawhṭanni khan drone hmang hian Imphal West beih ni leh bawkin, mi pathum an thi.

Drone hmanga beihna thleng vang hian Meitei chenna, Valley district-a lungawi lohna lantir a ni a, Kuki chunga hremna lekkawh an phut. BJP MLA leh CM Biren Singh-a makpa, Raj Kumar Imo Singh chuan union home minister Amit Shah hnenah ngenna thlenin, an state-a central force an dahte chu la chhuak tur leh, Kuki helpawl nena sorkar laipuiin inkahhai a puan pawh titawp turin a ngen tawh bawk a ni.