Union Minister hlui PR Kyndiah a thi

Meghalaya-a Congress politician langsar, Union Minister hlui Paty Ripple Kyndiah chu Ningani zan khan lungphu chawlin a thi.

Kum 87 mi, Kyndiah hi Ningani zan khan Shillong Bethany Hospital-ah dahluh a ni a, zan laiah a boral zui nghal niin a chhungte chuan an sawi.

Kyndiah hi kum 1928, May 7 khan a piang a, kum 1970 aṭanga 1993 thleng khan Meghalaya Legislative Assembly-ah member a ni a, kum 1975 leh 1988 inkarah cabinet minister ṭum li a ni bawk. Kum 1979 leh 1981 inkarah Meghalaya Legislative Assembly-ah eptu hruaitu a ni leh a, kum 1987-ah Acting Chief Minister atan ruat a ni bawk. Kum 1989 aṭanga kum 1993 thleng khan Meghalaya Legislative Assembly-ah speaker hna a chelh bawk.

Kyndiah hi kum 1993, February 10 aṭang khan kum 1998, January 28 thleng Mizoram Governor hna a chelh tawh bawk.

Kum 1998 khan Lok Sabha MP-ah Shillong bial aṭangin thlantlin a ni a, kum 1999 Lok Sabha inthlanah thlan nawn leh a ni a, kum 2004 Lok Sabha inthlanah thlan nawn leh niin, May 23, 2004 khan Union Minister of Tribal Affairs atan lakluh a ni.