ADB-in inkalpawhna tihchangtlun nan loan pe dawn

Asian Development Bank (ADB) chuan hmar­chhak state-te in­kal­pawh­na tihchang­tlun nan sorkar laipui hnenah loan USD maktaduai 300 a pe dawn.

ADB chuan USD maktaduai 500 senna tur, South Asian Sub-regional Economic Cooperation (SASEC) Road Connectivity Investment Programme a ruahman aṭangin hmarchhak bial inkalpawhna kawngpui tihchangtlunna tur hian loan a pechhuak a ni.

SASEC Road Connectivity Investment Programme kaltlang hian hmarchhak bial leh West Bengal hmar lamah lirthei kawngpui kilometre 500-a thui siam a ni ang.

ADB India Resident Mission-a country director M Teresa Kho chuan hmarchhak bial leh Bengal hmar lam biala inkalpawhna kawngpui tihchangtlun a nih chuan India ram state dangte leh SASEC member ramte nen pawh inkalpawhna changtlung tak a awm theih phah dawn a ni, a ti.

Loan thuthlung hi ADB aiawhin country director Teresa Kho hian a ziak a, India sorkar aiawhin Department of Economic Affairs-a Joint Secretary Tarun Bajaj-a'n a ziak.

Bajaj chuan Investment Programme hnuaia project kalpuina tur te chu ram venhimna kawng­a hmun pawimawh tak tak te an ni, a ti a, Asia chhim lam leh chhim chhak lam ram- Bangladesh, Bhutan, Myanmar, leh Nepal ram thlunzawmna tur a ni, a ti.

Tranche-1 project hnuaiah Manipur-ah kilometre 180-a thui National Highway siam a ni ang a, kawngpui hi Myanmar ram thlenga siam a ni ang. West Bengal hmar lamah kilometre 150-a thui National Highway siam a ni bawk ang. Project pa­hnihte hi kum 2021, December 31-a peihfel hman beisei a ni.