VDF rally-ah buaina a chhuak

Manipur khawpui, Imphal-a Village Defence Force (VDF) te'n Ningania rally an huaihawtah buaina a chhuak a, police te'n mi eng emaw zat an man.

All Manipur VDF Welfare Association chuan VDF te lawmman tihpunsak te, VDF batallion hran siam te leh service securtiy siam te an phut a, an thil phut nawr nan Ningani khan Imphal-a Chief Minister Ibobi Singh chenna-in panin kawng an zawh a ni.

VDF kawngzawhte hi po­lice te chuan lo dangin, a hnawhdarh nan silai an hmehpuah bakah tear gas shell eng emaw zat an kap chhuak.

Police team te hi Imphal West Additional SP (Law and Order) S. Ibomcha-a'n a ho a, kawngzawhte an lo dan avangin VDF kawngzawhte nen hian an inhnial buai a, tharum an hmang zui ta a ni.

Police te chuan VDF kawngzawha tel mi eng emaw zat an man.