AP Governor-in China nena inlaichina ṭha neih a duh

Arunachal Pradesh Governor Lt Gen Nirbhay Sharma (Retd) chuan India leh China inlaichinna chu thawh hona ṭha hmanga tihngheh a duh thu a sawi.

‘Voices from Aruna­chal: India-China Border Problems and related Arunachal Folklore’ thupui hmanga ni hnih awh seminar-ah Governor Sharma chuan thu sawiin, thawh hona ṭha rah­chhuah chu a hlawk a ni, a ti. "India leh China chuan ram hmasawn, chak leh hlawhtling nih an tum a, hei thil hian ram pa­hnihte hi a thlunzawm a, innghirnghona awm loin an awm ho thei a ni," a ti.

Governor chuan ramri biala cheng, mipuite khawthlirna aṭanga inlaichinna ṭha siam a pawimawh thu sawiin, an chanchin hlui leh thawnthu hluite ziaka dah ṭhatsak a pawimawh thu a sawi a, "Ramri biala mipuite thil ngaihven leh harsatnate chu kan hriatpui a ṭul a ni," a ti.

Governor Sharma chuan ram venhimna kawnga Arunachal Pra­desh leh hmarchhak state-te pawimawh thu tarlangin, hmarchhak bial chu Asia ram pariat luhka a nih thu a sawi bawk.

Seminar hi Kolkata-a Research Centre for Eastern and North Eastern Regional Studies leh Maulana Abul Kalam Azad Institute for Asian Studies te'n Aru­nachal Pradesh-a Rajiv Gan­dhi University te nen ṭang­rualin an huaihawt a ni.

Seminar hawnnaah Chief Minister Nabam Tuki pawhin thu sawiin, Arunachal chu hmasawnna kawng zawh tlai tak ni mah se North-East Frontier Agency (NEFA) a nih lai aṭangin kawng chhuk leh chho nasa a paltlang hnua tun dinhmun thleng thei a ni, a ti.

Chief Minister Tuki chuan Arunachal Pradesh laka sorkar laipuiin hmasawnna policy a kalpui chu tun hnaiah fimkhur taka kalpui ṭan a ni, a ti a, hetihlai hian kum 2008-a Prime Minister hlui, Manmohan Singh-a kaihhruai sorkarin ei leh bar dinhmun siamṭhatna atana ṭanpuina cheng vaibelchhe 33,000 a pek chu Arunachal hmasawnna bul ṭantu a ni, a ti.