Dimapur-ah IndiGo Airlines a service dawn

IndiGo Airlines chuan April 15 aṭangin Kolkata leh Nagaland, Dimapur inkarah thlawhtheihna a service tir dawn.

Kolkata aṭanga Dimapur thleng thlawhtheina ser­vice tur hi Kolkata kal­tlang­a Delhi-Dimapur inkar­a thlawhtheihna service tura ruahmanna pakhat a ni.

IndiGo Airlines chuan Dimapur-a service an pek tur chu India ram chhunga khawpui 33-a service an pekna tur a ni, tih a puang a, ramchhung leh rampawnah hmun 38-ah thlawhtheihna service an pe a ni.

Hetihlai hian Nagaland Lok Sabha MP awmchhun, Neiphiu Rio chuan tun hnai khan hmarchhak bial leh Nagaland-a inkalpawhna chhiat zia Lok Sabha inkhawma a sawi chhuah bakah hemi chungchang hi Civil Aviation Ministry leh Prime Minister Narendra Modi pawh a lo sawipui tawh bawk.

Rio chuan Dimapur-in kum 1972-ah airport nei tawh mah se tun thlengin thlawhtheihna panga chauh service a awm thu a sawi a, heng thlawhtheihnate hi Assam, Dibrugarh district nen an inṭawm thu leh Air India chuan kum 2013, November-ah Monday flight service a pek thu a sawi a, mahse hei hi tunah tihtawp tawh a ni, a ti.

Dimapur airport-ah zan lama thlawhtheihna ṭum theihna tur, night landing facility vuah ni mah se Airports Authority of India chuan a hman ngai loh thu Rio chuan a sawi bawk a, tun hnaia Prime Minister-in Nagaland a tlawh ṭum chauhin hman a nih thu a sawi bawk. Night landing facility chu thlawhtheihna zawng zawng hman theiha phalna pek ṭha a tih thu a sawi.

Nagaland MP Rio chuan Dimapur kal­kawng­­ah 'no fly zone' siam a nih avangin thlawh­theihna te'n kawng thui lamah an thlawh a ṭul thu a sawi a, hemi atan hian Defence Ministry chu clearance pe tura a phut thu a tarlang bawk.