Meghalaya-ah hri kai thar tam ber ni thleng Community spread a thleng tawh - Deputy CM

Meghalaya-ah kar liam ta Inrinni khan coronavirus kai hmuh chhuah thar mi 182 an awm a, hei hi an state-a ni khata hri kai hmuh chhuah tam ber ni a ni. 

Director of Health Services (DHS) Dr. Aman War chuan hri kai hmuh thar zingah armed force mi leh sa panga an tel a, East Khasi Hills district mi 121 an tel bawk tih a sawi. 

Deputy chief minister Prestone Tynsong chuan Inrini-a review meeting a neihah an state-ah com­munity spread chu a thleng ṭan tawh niin a sawi. Health minister AL Hek pawhin an state-a hri kai pun chhoh dan en chuan community transmission a ni tawh tiin a lo sawi tawh a ni. 

Deputy CM chuan hri kai hmuh thar chu ni khatah mi 60 chuang an ni chho zel tawh nia sawiin, sorkarin hri darh tur venna atana kaih­hruaina a siamte chu mi tam takin an zawm ṭha lo a ni, a ti. 

Meghalaya-ah hian hri kai hmuh chhuah tawh hi 2,734 an awm tawh a, an zinga 14 in an thihpui tawh a ni.