KNP-ah samak a pung

Kaziranga National Park-a samak awm zat chhiarpui neih chu kar kalta Inrinni khan tlangzarh a ni a, samak awm zat hi 2400-ah a pung tih hmuhchhuah a ni.

Assam forest department-in census a neihah hian KNP-a samak awm zat hi 2,401 a ni a, kum hnih kalta chhung khan samak hi 71-in a pung a ni. Census hi kar kalta Thawhlehni, March 24 aṭangin Zirtawpni, March 27 thleng neih a ni.

Census hi kum thum chhungin vawi khat neih ṭhin a ni a, census hnuhnung ber chu kum 2012 khan neih a ni. Sa pel ru ṭhin te'n kum 2012 chhunga samak ṭhahnem tak an kah avangin kum 2013 khan special census neih a lo ni tawh bawk.

Kum 2012 census-ah KNP-ah hian samak 2,290 an awm a, kum 2013 special census-ah 2,329 an awm a ni.

Tun ṭuma census neihah hian samak puitling 1,651, la puitling chiah lo 294, la naupang deuh 251 leh a note 205 an awm thu Kaziranga DFO S.K. Seal Sarma chuan a sawi.

Samak chhiarpui neih nan hian Forest department leh wildlife NGO hrang hrang ṭangrual chuan KNP chu block 81-ah an ṭhen a, mi 200 chuangin sai 36 vel hmangin samak awmte an chhiar a ni.