Manipur leh N'land-in ramria remna leh muanna awm an duh

Nagaland, Phek district leh Manipur, Ukhrul district ramria boruak ṭhalo a thlen hnuah Nagaland leh Manipur official te chuan buaina a chhuah loh nan leh remna leh muanna a awm theih nan theihtawp chhuaha hmalak an rel.

Phek district leh Ukhrul district thuneitute chuan Inrinni khan Jessami, Manipur-ah meeting an nei a, boruak ṭha lo a thlen zui loh nan ramria state pahnih mipuite chu tharum hman tir lo ve ve turin an intiam a ni.

Shora Phung khua (Manipur) leh Kerjang (Nagaland) khuaa ram inchuh thubuai avangin ramri mipuite inkarah tun hnai khan inhmuhthiamlohna a thleng a, ramri district pahniha thuneitute chuan boruak muan­awm a awm theih nan hma an la zui nghal a ni.

State pahnihte ramri chhehvela khaw mipui­te chuan ramri inchuh thubuai chinfel a nih hmaa mipuite ralmuang taka an awm theih nan inremna lailawk siam an remti bawk.

Shora Phung khua leh Kerjang khaw mipuite'n inremna lailawk an neih theih nan Jessami khua leh Meluri khuaa SDO te chu meeting ruahman tura ruat an ni bawk.

Inrinnia meeting neih­ah hian Ukhrul leh Phek district-a DC, SP leh ASP bakah Meluri leh Jessami khuaa SDO te leh Shora Phung leh Kerjang khaw mipui aiawhte an tel a ni.