Congress-in NBFC sum tihchingpen CBI chhuitir phut

Tripura-a eptu party Congress chuan non-banking financial companies (NBFCs) te'n sum peipun tumte sum an tihchingpensak thubuai chu Central Bureau of Investigation (CBI) chhuitir a phut.

Congress chuan rorellai Communist Party of India-Marxist (CPI-M) hotute chu he sum chingpen chungchangah hian inhnamhnawihah an puh a, mahse CPI-M chuan Congress puhna hi a pha thung.

Congress party chuan hemi chungchangah hian kar kalta Inrinni khan Tripura Governor P.B. Acharya an hmu a ni.

Tripura assembly-a eptu hruaitu, Sudip Roy Barman chuan, "Dan phal loha Tripura-a NBFC din te'n sum an tihchingpen dan chhuichiang turin Govenor Acharya chu sorkar laipui nawr tur leh CBI chhuitir turin kan ngen a ni," a ti.

"Chit fund company te sum tihchingpen dan­ah CBI chuan thubuai tlem azawng a chhui zui mek a, mahse CBI chu sorkar thuneitute inhnamhnawih dan leh company te pawikhawih dan zawng zawng chiang taka chhui turin kan duh a ni," tiin Barman chuan a sawi bawk.

CPI-M state secretary Bijan Dhar chuan Congress party puhna chu chhangletin, rorellai Left Front sorkar chu chit fund company te pawikhawihna khuah­khirhna atana India rama dan siam hmasa ber a ni, a ti a, NBFC te chhui chiang tura CBI hnena ngenna siam hmasa ber a nih thu a sawi bawk.

"Congress hian thil thar eng mah tihchhuah an nei lo a, mipuite rilru hruaikawi nan record hlui an rawn phawrh­chhuak leh mai mai a ni," tiin Dhar chuan a sawi.

Dan pawmpui loh NBFC te leh chit fund company ṭhenkhatte sum tihchingpen dan chhuichiang turin kar kalta khan Tripura High Court chuan state sorkar chu Special Investigation Team (SIT) din turin a lo hriattir tawh bawk.

Kum 2013 khan Tripura sorkar chuan NBFC leh chit fund company te sum tihchingpen thubuai 37 chu chhui­tir turin CBI kutah a hlan a, mahse CBI chuan thubuai panga chauh a chhui zui a ni.

NBFC leh chit fund company ṭhenkhatte chuan sum peipun tumte chu a pung sang taka pek tiamin an pawisa an dahtir a, pawisa an laksak hnuah an bibo zui ṭhin a ni.