Sorkar laipui leh NSCN (K)-in meeting nei

Sorkar laipui leh Khaplang-a kaihhruai Nationalist Socialist Council of Nagaland (NSCN-K)-in kum 14 chuang inkahhai thu­thlung an lo neih tawh chu April 27-a a tawp dawn avangin inkahhai thutlung nei chhunzawm tawh lo tur angin thuthang a darh hman a, mahse sorkar laipui leh NSCN-K chuan hemi chungchang hi ngaihtuah­in kar kalta Zirtawpni khan Dimapur-ah Cease Fire Supervisory Board (CFSB) meeting an nei.

CFSB chairman Lt Gen NK Singh (retd) chuan meeting chu thla hmasa khan neih tura ruahman ni mah se kar kalta Zirtawpni, March 27 khan neih a nih zawk thu a sawi a, inkahhai thuthlung chhunzawm dan tur chungchang an rel thu a sawi.

CFSB-a NSCN (K) supervisor Wangtin Naga chuan an member zingah inkahhai thuthlung chhunzawm duh lo awm mah se NSCN (K) chuan inkahhai thuthlung siam a duh thu a sawi a, Nagaland-a remna leh muanna a awm zel theih nan hmalak mek zel a ni, a ti.

Sorkar laipuiin inkahhai thuthlung chhunzawm loa tihtawp a tum nia sawi chungchangah CFSB chairman Singh chuan NSCN (K) chu Myanmar helpawl an nih avangin engmah a sawi lawk theih loh thu a sawi a, NSCN (K) te'n Suruhuto camp leh Phutkong camp an chhuahsan chungchangah Singh chuan sipaite'n an laka beihpui an thlak avanga chhuahsan an nih thu leh camp pahnihte chu Assam Rifle te'n an luah tawh thu a sawi bawk.

Hetihlai hian Nagaland tualchhung chan­chinbu te chuan NSCN (K) chairman SS Khaplang leh hotu dangte chuan kum 14 chuang inkahhai thuthlung an lo neih tawh chu neih chhunzawm loh an duh tiin an tarlang thung.

NSCN (K) supervisor Wangtin chuan CFSB meeting neih zawhah inkahhai thutlung chu a la tawp loh thu a sawi.

March 26-a Wokha-a bomb puak leh Kohima-a Assam Rifle te kah an nih chungchangah Wangtin chuan, "Pawl ṭhenkhatin remna an duh lo a, tute nge mawhphurhtu tih chu hunin a la herchhuahpui ngei ang," a ti.

Eastern Nagaland Peoples’ Organisation (ENPO) chuan NSCN (K) leh sorkar laipui chu Nagaland chhuah lam mipui­te hmakhaw ngaia inkahhai thu­thlung chhunzawm turin an ngen.