UN Human Rights Council-ah NE mipuite dikna chanvo chuangchang sawi lang

March 2 aṭanga 27 thleng Switzerland, Geneva khawpuia United Nations Human Rights Council general session vawi 28-na neihah Irom Sharmila-i unaupa, Irom Shinghajit chuan Armed Forces (Special) Powers Act (AFSPA) hnuaia hmarchhak bial mi­pui­te dikna chanvo chung­­chang a sawi lang.

Session-ah hian Manipur-a Human Rights Initiative director, Babloo Loitongbam pawh a tel.

Shinghajit chuan kar kalta Inrinnia Imphal a lo thlen hnuin thuthar thehdarhtute a kawm nghal a, human right bakah hnam tlem zawkte chungchang, chi leh chi inthliarna leh hmeichhiate dikna chanvo chungchang chu session thupui a ni, a ti.

Sharmila-i unaupa Shinghajit chuan kum 57 chuang sorkar laipuiin a lo lekkawh tawh AFSPA hlih a nih theih nana a farnuin a beih dante leh AFSPA hnuaia hmar­chhak mipuite dikna chanvo chungchang te a sawi lan thu a sawi.

"AFSPA chuan India sipaite chu hmarchhak state pasarih leh Jammu & Kashmir-ah thuneihna pumhlum pein, sipaite chuan pawi khawih mah se hrem theih an ni lo a, hei hian mihring dikna chanvo palzutna a tipunlun a ni," tiin Shinghajit chuan a sawi bawk.

Sorkar laipui chuan AFSPA chungchang zirchiang turin kum 2004 khan committee a din a, mahse committee-in AFSPA hlip tura a rawt­na hi tun hnai khan sor­kar laipuia NDA sorkar chuan a hnawl a ni.