AIIMS sakna hmun tur inchuh vangin buaina chhuak

Assam-a All India Institute Of Medical Science (AIIMS) dinna hmun tur chungchangah Raha mipuite chuan lungawilohna an lantir.

Mipuite chuan AIIMS chu Changsari-ah din lo a, Raha-ah din zawk turin sorkar an ngen a, Zirtawpni khan police te leh mipuite innawr buaiin, mi pakhatin nunna a chan bakah hliam eng emaw zat an awm a, an zingah hian additional Superintendents of Police pahnih pawh an tel a ni.

Raha khaw mipui lungawi lo te hian sorkar motor leh thil neih eng emaw zat an tichhia. Buaina hi zing lam aṭanga inṭan a ni a, mipui 2,000 vel pungkhawm te chuan National Highway 37 an dang a, AIIMS Raha-a din an phut thu an tarlang. Highway hi Lower leh Upper Assam panna kawngpui pawimawh a nih avangin police te chuan lungawilote chu an thil tih tawp san turin an ngen a, thupek zawm loin pungkhawmte chuan lungin police te hi an tawng zui nghal a ni. Mipui hnawhdarh nan hian tear-gas hman a nih bakah police te chuan van lam hawiin sipali an hmet puak a ni. Additional SP Hiranya Kumar Barman leh Abdel Quadir Arief te chuan hliam an tuar tih police report chuan a tarlang.

Assam Chief Minister Sarbananda Sonowal chuan buaina chhuak chu pawi a tih thu sawiin, nunna chan chhungte chu cheng nuai nga pek an nih tur thu leh hliam tuarte chu cheng 50,000 ṭheuh pek an nih tur thu a sawi. Minister Chandra Mohan Patowarym, Keshab Mahanta, MLA Rama Kanta Deuri leh Piyush Hazarika te chuan buaina chhuahna hmun hi an pan nghal a, Additional Chief Secretary Rajib Bora chu pawikhawihna thlen dan chhui chiang tura tih a ni bawk. Minister Patowary chuan AIIMS dinna hmun tur chungchangah hian state sorkar chuan thuneihna a neilo a, sorkar laipui chuan a hmun tur hi a thlang fel dawn tih a sawi.

Inrinni khan Raha-ah hian darkar 10 awh bandh huaihawt nghal a ni a, dawr leh sumdawnna hmunte khar a nih bakah lirthei che vel hmuh tur a awm meuh lo. Bandh huaihawttute hian media te pawh an tawng nia sawi a ni a, an lirtheite lungin an vawm a ni. Raha Circle Officer Pallavi Kachary chuan lungawilote hian Nagaon district an pan a, sorkar motor leh building an hmuh ang ang an tawng a, circle office building pawh an tichhia niin a sawi. Nagaon Superintendent of Police Yshey Tshewang Gyatso chuan nunna chan ta chu mipui pungkhawm ten an chilhlum niin a sawi ve bawk.